Það helstA.

Ég er fæddur og alinn upp, vafalaust með misjöfnum árangri, í Hafnarfirði. Er menntaður cand scient í sameindalíffræði / líffræðingur frá Odense Universitet í Danmörku árið 1993.

Eftir nám starfaði ég um tíma við krabbameinsrannsóknir á Landspítalanum en síðustu 26 árin starfaði ég samfleitt fyrir Náttúruverndarráð, Náttúruvernd ríkisins, Umhverfisstofnun (stofnanabreytingar) og Náttúrufræðistofnun Íslands. Hjá þessum stofnunum hefur starfið verið fjölbreytt en þó alltaf tengst náttúruvernd og náttúrufræði. Má þar nefna lífríkis- og friðlýsingamál almennt, fræðslu, verið yfirmaður landvarða og landvarðanámskeiða og haft umsjón með og tekið þátt í fjöbreyttu alþjóðlegu samstarfi sem fulltrúi Íslands og fyrrgreindra stofnana m.a. á sviði noðurheimskautsmála og Norræns samstarfs og þá sérstaklega á sviði samningsins um vernd líffræðilegrar fjölbreytni, Ramsarsamningsins og Bernarsamningsins.

Ég starfaði sem fostöðumaður visfræði- og ráðgjafadeildar Náttúrufræðistofnunar Íslands til 2021. Var formaður yfirstjórnar Natura Ísland verkefnisins, sem m.a. var styrkt af ESB, og fjallaði um vistgerðarkortlagningu Íslands og úttekt á mikilvægum fuglasvæðum á Íslandi. Var yfirmaður náttúruminjaskrár f.h. Náttúrufræðistofnunar þegar lagðar voru fram tillögur stofnunarinnar að verndarsvæðum á framkvæmdaáætlun náttúruminjaskrár, þ.e. B-hluta skrárinnar, árið 2018 skv. lögum um náttúruvernd nr. 60/2013. Fyrirhugað er að þessar tillögur verði grunnur að og framlag Íslands að vistfræðilegu neti verndarsvæða sem er hluti af því sem er kallað Emerald Network samkvæmt Bernarsamningnum. NATURA 2000 er framlag Evrópusambandsins til netsins. Mörg síðustu árin bar ég ábyrgð á umsögnum og álitsgerðum Náttúrufræðistofnunar, í samvinnu við forstjóra stofnunarinnar, og var yfrmaður ráðgjafaverkefna (útseldrar vinnu) Náttúrufræðistofnunar allt til ársins 2021.

Hef setið í fjölda nefnda og starfshópa fyrir hönd þeirra stofnana sem ég hef starfað fyrir og væri það að æra óstöðugan að nefna það allt hér. Rétt er þó að nefna nefnd um Hvítbók í náttúruvernd, vinna við gerð nýrra náttúruverndarlaga, fagráð náttúruminjaskrár, Breiðafjarðarnefnd, Erfðanefnd landbúnaðarins, ráðgjafanefnd um erfðabreyttar lífverur og starfshóp um áhrif loftslagsbreytinga á lífríki Íslands.

Fyrir utan framangreint hef ég komið að ýmsu öðru s.s. setið í stjórn FÍN, félags íslenskra náttúrufræðinga, í um tuttugu ár og einnig verið í ýmsum pólítískum nefndum Hafnarfjarðarbæjar s.s leikskólanefnd, umhverfisnefnd og skipulags- og byggingarráði.

Fyrir háskólanám frá 17 ára aldri var ég verkamaður í ýmsum störfum í um 10 ár. Útskrifaðist ,, því miður“ ekki með neina gráðu en skilning á ýmsu sem ég hefði ekki viljað fara á mis við.

Nú er ég sjálfstætt starfandi ráðgjafi á svið náttúru- og umhverfisverndar.